Aprelin 15-i görkəmli oftalmoloq-alim, akademik Zərifə Əliyevanın anım günüdür. O, Azərbaycan oftalmologiya elminin inkişafına mühüm töhfələr verən, elmi fəaliyyəti və ictimai mövqeyi ilə dərin iz qoymuş şəxsiyyətlərdən biridir.
Zərifə Əliyeva 1923-cü ildə Naxçıvanın Şahtaxtı kəndində anadan olub. Azərbaycan Tibb İnstitutunu bitirdikdən sonra təhsilini Moskvada davam etdirib və 1949-cu ildən elmi fəaliyyətə başlayıb. Onun ilk tədqiqatları o dövrdə geniş yayılmış traxoma xəstəliyinin müalicəsinə həsr olunub. Alim bu sahədə yeni müalicə üsulları tətbiq edərək xəstəliyin ölkədə aradan qaldırılmasında mühüm rol oynayıb.
Zərifə Əliyeva oftalmologiyanın müxtəlif istiqamətləri üzrə – qlaukoma, iltihabi göz xəstəlikləri, diaqnostika və müalicə üsulları sahəsində mühüm araşdırmalar aparıb. O, eyni zamanda görmə orqanının peşə patologiyasını dərindən tədqiq edən ilk alimlərdən biri olub, bu sahədə xüsusi laboratoriya yaradaraq yeni elmi istiqamətin əsasını qoyub. Onun elmi fəaliyyəti nəticəsində bir sıra dəyərli monoqrafiyalar və dərs vəsaitləri ərsəyə gəlib.
Gərgin və məhsuldar elmi fəaliyyətinə görə alim 1980-ci ildə “Əməkdar elm xadimi” fəxri adına layiq görülüb. 1981-ci ildə oftalmologiya sahəsində əldə etdiyi nailiyyətlərə görə SSRİ Tibb Elmləri Akademiyasının M.İ.Averbax adına mükafatına layiq görülən ilk qadın olub. 1983-cü ildə isə Azərbaycan Elmlər Akademiyasının həqiqi üzvü seçilib.
Zərifə Əliyeva yalnız alim kimi deyil, həm də fəal ictimai xadim kimi tanınıb, müxtəlif elmi və ictimai təşkilatlarda təmsil olunub. O, Ümummilli lider Heydər Əliyevin layiqli davamçısı Prezident İlham Əliyevin anasıdır.
Zərifə xanımın ömür yolu elmə sədaqətin, insanlara xidmətin və yüksək mənəvi dəyərlərin parlaq nümunəsi kimi bu gün də hörmətlə xatırlanır.