Ankara ikitərəfli münasibətlərin normallaşdırılması məsələsində Ermənistandan konkret addımlar gözləyir.
Bu barədə Türkiyənin xarici işlər naziri Mövlud Çavuşoğlu TRT telekanalının efirində deyib.
“Biz hələ Ermənistandan konkret addımlar görməmişik. Artıq Nikol Paşinyanın rəhbərlik etdiyi administrasiya bu istiqamətdə müsbət addımlar atmalıdır”, – deyə Mövlud Çavuşoğlu bildirib.
İyulun 1-də Türkiyə və Ermənistanın xüsusi nümayəndələrinin Vyanada keçirilən görüşündə üçüncü ölkə vətəndaşlarının Türkiyə-Ermənistan quru sərhədindən keçmək imkanının tez bir zamanda təmin edilməsi və iki ölkə arasında yüklərin hava yolu ilə daşınmasına başlanması qərara alınıb.
Bu iki dövlətin ümumi sərhədə malik olmasına baxmayaraq, Türkiyə ilə Ermənistan arasında diplomatik əlaqələr mövcud deyil. 2009-cu ildə Sürixdə iki dövlətin xarici işlər nazirləri diplomatik münasibətlərin qurulması və qarşılıqlı münasibətlərin prinsipləri haqqında protokollar imzalasalar da, sonradan bu sənədlər ratifikasiya olunmayıb. 2018-ci il martın 1-də Ermənistan protokolları ləğv edib. 2021-ci ildə hər iki ölkədə ikitərəfli münasibətlərin tənzimlənməsi üçün xüsusi nümayəndələr təyin edilib.