Bu il fevralın 7-nə təyin edilmiş prezident seçkilərində Azərbaycanın yəhudi mənşəli vətəndaşları da hər zaman olduğu kimi fəal iştirak edəcəklər. Azərbaycan Gürcü – Sefarad yəhudiləri dini icması növbədənkənar prezident seçkilərinin keçirilməsi qərarını müsbət qarşılayır.
Bu fikirləri “secki-2024.az” saytına açıqlamasında Azərbaycan Gürcü – Sefarad yəhudiləri dini icmasının sədri, ravvin Zamir İsayev deyib.
“Bu seçkilər ümumilikdə Azərbaycanın, o cümlədən cəmiyyətimizin, dövlətimizin daha da inkişafına öz töhfəsini verəcək”, – deyə ravvin əlavə edib.
Zamir İsayev Azərbaycanın qazandığı nailiyyətlərin uğurla davam etdiriləcəyinə inanır. Ravvin hesab edir ki, Azərbaycan dövləti qazandığı Zəfəri, uğurları qoruyub-saxlamaq gücündədir. Bu seçkilərdə də ölkə ictimaiyyəti daha güclü dövlət naminə öz seçimini edəcəklər.
O, sonda sədri olduğu icma üzvlərini seçkilərdə fəal iştiraka səsləyib.