Almaniyanın əsas regional hava limanlarından biri olan Köln aeroportunda iyulun 24-də səhər saatlarında beş iqlim fəalı hasarın üzərindən aşaraq uçuş-enmə zolağına çıxıb. Dispetçerlər uçuşları dayandırmaq məcburiyyətində qalıblar.
Xarici medianın Köln-Bonn hava limanına istinadla verdiyi məlumata görə, bütün uçuşlar dayandırılıb və polis hadisə yerinə gəlib.
“Last Generation” (“Sonuncu nəsil”) ekoloji hərəkatının nümayəndələri təşkilat üzvlərindən birinin əlləri uçuş zolağına yapışmış fotoşəkillərini dərc ediblər.
Polis yerli vaxtla saat 09:15-də əməliyyatın başa çatdığını elan etməzdən əvvəl Kölnə gələn bir neçə reys yaxınlıqdakı digər hava limanlarına yönləndirilib. Köln-Bonn Hava Limanı daha sonra uçuşların bərpa olunduğunu, lakin gün ərzində aviareyslərin ləngiməsi və ləğv edilməsinin gözlənildiyini bildirib. BBC xəbər xidməti xəbər verir ki, sərnişinlərə məlumat üçün öz aviaşirkətləri və ya tur operatorları ilə əlaqə saxlamaq tövsiyə edilib.
“Last Generation” hərəkatı Almaniya hökumətinin 2030-cu ilə qədər neft, qaz və kömürdən imtina etmək üçün qlobal razılaşma əldə etməsini istədiyini bildirib və çərşənbə günü Avropa və Şimali Amerikadakı hava limanlarında analoji dinc, vətəndaş etirazlarının planlaşdırıldığı barədə məlumat verib.
Beynəlxalq xəbər agentliklərinin məlumatına görə, Finlandiyada “Elokapina” ətraf mühit hərəkatının fəalları iyulun 24-də Helsinki-Vantaa hava limanında nümayiş keçirib və uçuşdan əvvəl yoxlamaya girişi bloklayıblar, lakin heç bir gecikmə və ya pozuntuya yol verilməyib.
Bundan əlavə, “Oil Kills” qrupu bildirib ki, Barselonanın El Prat Beynəlxalq Hava Limanında keçirilən etiraz aksiyası zamanı onun beş fəalı saxlanılıb, Osloda isə üç ətraf mühit fəalı Norveçin əsas hava limanı olan Gardermoendə ətraf hasarını uçurub.
Köln-Bonn Almaniyanın Hamburq, Düsseldorf, Berlin-Brandenburq, Münxen və Frankfurtdan sonra altıncı ən işlək hava limanıdır. Bu ilin may ayında bir neçə iqlim dəyişikliyi etirazçısının uçuş-enmə zolağına çıxmasından sonra Münxen hava limanı fəaliyyətini iki saatlığa dayandırmağa məcbur olmuşdu. İğtişaşlar nəticəsində 11 reys dəyişdirilib, 60-a yaxın uçuş ləğv edilib.
Qısa müddət sonra Almaniyanın daxili işlər naziri Nensi Feser Münxen hava limanında təhlükəsizlik tədbirlərinin nəzərdən keçiriləcəyini bəyan edib.