Media Təhlil Mərkəzinin (MTM) Analitik qrupunun fikrincə, günün TOP-5 mövzusu aşağıdakılar ola bilər:
1. Avropanın enerji təhlükəsizliyinin təmin olunmasında Azərbaycan-Macarıstan əməkdaşlığı
Azərbaycanla Macarıstan arasında enerji sahəsində əməkdaşlıq, xüsusilə təbii qazın nəqli və enerji infrastrukturunun diversifikasiyası baxımından strateji əhəmiyyət daşıyır. Macarıstan Azərbaycanın enerji resurslarını Avropa bazarına çıxış üçün önəmli körpü kimi dəyərləndirir. Bu əməkdaşlıq Avropanın enerji təhlükəsizliyinin gücləndirilməsinə və Rusiyadan asılılığın azaldılmasına töhfə verir.
2. Ermənistan geosiyasi çəkişmələr burulğanında
Ermənistan hazırda Qərb, Rusiya və İran arasında gedən geosiyasi rəqabətin mərkəzində çətin balans axtarışındadır. Rusiyadan uzaqlaşmağa meyilli olan rəsmi İrəvan Qərblə yaxınlaşmağa çalışsa da, bu proses daxildə narahatlıq və qeyri-sabitlik yaradır. Ermənistanın bu burulğanda öz suverenliyini və təhlükəsizliyini necə qoruyacağı açıq sual olaraq qalır.
3. İranın müdafiə nazirinin Ermənistana səfəri
İranın müdafiə nazirinin Ermənistana səfəri Tehranın regional siyasətində İrəvana verdiyi əhəmiyyətin göstəricisidir. Səfər zamanı təhlükəsizlik, müdafiə əməkdaşlığı və sərhəd bölgəsində sabitlik məsələləri müzakirə olunub. Bu səfər həm də İranın Cənubi Qafqazda nüfuzunu qorumaq və Zəngəzur dəhlizi ilə bağlı narahatlıqlarını ifadə etmək məqsədi daşıyır.
4. Rusiyanın xarici işlər nazirinin İrəvana səfəri
Serqey Lavrovun Ermənistana səfəri Moskva-İrəvan münasibətlərindəki gərginliyi azaltmağa yönəlmiş diplomatik addımdır. Səfər zamanı KTMT, Ermənistanın Qərbə yönələn siyasətinin müzakirəsi gözlənilir. Rusiya bölgədəki mövqeyini qorumağa çalışsa da, Ermənistanın yeni geosiyasi istiqaməti münasibətləri çətinləşdirir.
5. Trampın Ukrayna və Rusiya liderləri ilə telefon danışığı
Donald Trampın Ukrayna və Rusiya liderləri ilə apardığı telefon söhbəti danışıqların yeni mərhələyə daxil olduğunu göstərir. Trampın bu danışıqlarla münaqişəyə “sürətli həll” vəd etməsi onun hakimiyyətinin əsas mövzulardan biridir. Danışıqlar həm də ABŞ-nin gələcək xarici siyasət konturlarını göstərir.