2 fevral – Ümumdünya Su-Bataqlıq Əraziləri Günüdür.
Daha çox suda üzən quşların əsas mənbəyi olan və beynəlxalq əhəmiyyət daşıyan su-bataqlıq əraziləri haqqında Konvensiya 1971-ci il fevralın 2-də İranın Ramsar şəhərində imzalanıb. Konvensiyanın əsas məqsədi dünyada davamlı inkişafın əldə olunmasında bir vasitə kimi su-bataqlıq ərazilərindən səmərəli istifadə etmək və onları qorumaqdır.
Həmin vaxt konvensiyaya 18 ölkə qoşulsa da, hazırda onların sayı 172-ə çatıb. Ümumi sahəsi 254,7 milyon hektardan çox olan 2435 ərazi beynəlxalq əhəmiyyətli su-bataqlıq əraziləri kimi “Ramsar siyahısı”na daxil edilib.
Respublikamızda ümumi sahəsi 200 min hektardan artıq olan su-bataqlıq əraziləri mövcuddur. Sahəsi 1000 hektardan böyük olan belə ərazilərin sayı isə təqribən 20-yə yaxındır. Qızılağac, Ağgöl və Şirvan milli parkları, Mahmudçala, Hacıqabul gölü, Kür çayının deltası, Sarısu, Dəvəçi limanı və Xəzərin sahilboyu hissələri belə ərazilərə aiddir. Hər il bu ərazilərə qışlama və köç mövsümündə 100 minlərlə müxtəlif quş növləri toplanır.
“Əsasən su quşlarının yaşama yerləri kimi beynəlxalq əhəmiyyəti olan sulu-bataqlıq yerlər haqqında” Ramsar Konvensiyası 2001-ci il iyulun 18-də ratifikasiya edilib. 2003-cü il iyulun 5-də isə Azərbaycan Prezidentinin Sərəncamı ilə Ağgöl Dövlət Təbiət Qoruğunun sahəsi 17 min 924 hektara qədər genişləndirilib və ona milli park statusu verilib. Sonuncu milli park olan Qızılağac Milli Parkı Prezident İlham Əliyevin 2018-ci il sentyabrın 26-da imzaladığı Sərəncama əsasən eyniadlı qoruğun bazasında yaradılıb. Eyni zamanda, Ağgöl, Böyük və Kiçik Qızılağac körfəzləri mühüm su-bataqlıq əraziləri kimi 2001-ci il mayın 25-də “Əsasən su quşlarının yaşama yerləri kimi beynəlxalq əhəmiyyəti olan sulu-bataqlıq yerlər haqqında” Ramsar Konvensiyasının “Ramsar siyahısı”na daxil edilib.
Bu günün qeyd edilməsində 95-dən artıq ölkə xüsusi təşəbbüs göstərib. Hazırda hər il dünyanın bir çox ölkəsində dövlət, qeyri-hökumət müəssisələri, təşkilatlar cəmiyyəti su-bataqlıq ərazilərinin əhəmiyyəti haqqında məlumatlandırmaq üçün müxtəlif tədbirlər, müsabiqələr, seminarlar keçirirlər.
Fevralın 2-də Ümumdünya Su-Bataqlıq Əraziləri Günü ilə əlaqədar Qızılağac, Şirvan, Abşeron və Ağgöl milli parklarında ziyarətçilər üçün “quşların müşahidəsi (birdwatching)” təşkil olunur. Həmin milli parkları ziyarət edən turistlər köçəri quşların miqrasiya marşrutu üzərində yerləşən Qızılağac Milli Parkında “Turac”, Abşeron Milli Parkında “Şah dili”, Şirvan Milli Parkında “Qızılqaz gölü”, Ağgöl Milli Parkında isə “Böyük Ağgöl” marşrutlarında bir çox ornitofauna növlərini müşahidə etmək imkanı əldə edirlər.