
“Minalar Əleyhinə Azərbaycan Kampaniyası” İctimai Birliyinin təşkilatçılığı ilə dekabrın 4-də “Minalardan Azad Cənubi Qafqaz” regional kampaniyası çərçivəsində “Cənubi Qafqazda mina qurbanları ilə həmrəylik: Cənubi Qafqazda minaların və onların nəticələrinin ləğvi strategiyasının mühüm sütunu” mövzusunda dəyirmi masa keçirilir.
Tədbirdə Milli Məclisin deputatları, ANAMA, Ombudsman Aparatı, QHT-lər və beynəlxalq ictimaiyyətin nümayəndələri, o cümlədən Avropa İttifaqının (Aİ) Azərbaycandakı səfiri və Aİ-yə daxil olan altı ölkənin səfiri, eləcə də minadan zərərçəkənlər iştirak edirlər.
“Minalar Əleyhinə Azərbaycan Kampaniyası” İctimai Birliyinin sədri Hafiz Səfixanov tədbirdə çıxış edərək bildirib ki, Azərbaycan 30 ildən artıqdır mina problemi ilə qarşı-qarşıyadır. “Azad edilən ərazilərdə aparılan işlər nəticəsində bir milyondan çox minanın basdırıldığı məlum olub. Lakin işğal zamanı yalnız burada deyil, Ermənistan və İranla sərhəddə də minalar basdırılıb. Azərbaycan hazırda Cənubi Qafqazda minalardan ən çox əziyyət çəkən ölkədir. Təəssüf ki, hazırda Cənubi Qafqazda heç bir ölkə Ottava Konvensiyasına qoşulmayıb və bu da çox ciddi məsələdir. Ümidvaram ki, ölkələr mina problemi ilə əlaqədar daha diqqətli olacaqlar. Biz 44 günlük Vətən müharibəsindən sonra demək olar ki, hər gün mina qurbanları barədə xəbərlər alırıq”, – deyə İctimai Birliyinin sədri qeyd edib.


