Bu gün Bakıda Kiçik və Orta Biznesin İnkişafı Agentliyi (KOBİA) və Türkiyənin Müstəqil Sənayeçi və İş Adamları Dərnəyinin (MÜSİAD) təşkilatçılığı ilə 25-ci Beynəlxalq Biznes Forumu (IBF- International Business Forum) işə başlayıb.
Tədbirdə bir sıra ölkələrdən iş adamları və dövlət xadimləri iştirak edir.
Forum ikitərəfli ticari-iqtisadi münasibətlərin inkişafı, dayanıqlı əməkdaşlıq modellərinin yaradılması, investisiyalar və biznes sahəsində əlaqələrin möhkəmləndirilməsi məqsədilə təşkil edilir. 1995-ci ildə MÜSİAD tərəfindən təsis olunmuş və ildə bir dəfə keçirilən IBF Forumu çərçivəsində panel görüşləri, ölkələrin təqdimatları, ikitərəfli görüşlər və digər tədbirlər təşkil olunur.
Tədbirdə iştirak etmək üçün Türkiyədən 550 iş adamı gəlib. Forum zamanı Azərbaycan iqtisadiyyatının inkişaf perspektivləri, investisiyalar və digər məsələlər müzakirə olunacaq.
IBF-in rəsmi media tərəfdaşları Trend BİA, Day.az və turkic.world media layihəsidir.
