![](https://mtm.az/wp-content/uploads/2024/04/image-117.png)
Bakıda keçiriləcək güləş üzrə Olimpiya Təsnifat turnirində iştirak edəcək Azərbaycan yığmalarının heyəti bəlli olub.
Azərbaycan Güləş Federasiyasından bildiriblər ki, milli komanda yarışda 14 güləşçi ilə təmsil olunacaq.
Aprelin 5-də yunan-Roma güləşi üzrə mübarizə baş tutacaq. Nihat Məmmədli (60 kiloqram), İslam Abbasov (87 kiloqram), Murad Əhmədiyev (97 kiloqram) və Beka Kandelaki (130 kiloqram) ilk yarış günündə Olimpiadaya lisenziya qazanmağa çalışacaq.
Növbəti gün qadın güləşi üzrə millinin 5 üzvü xalça üzərinə çıxacaq. Mariya Stadnik (50 kiloqram), Elnurə Məmmədova (53 kiloqram), Jalə Əliyeva (57 kiloqram), Birgül Soltanova (62 kiloqram) və Elis Manolova (68 kiloqram) ölkəmizi bu növdə təmsil edəcək.
Son yarış günündə estafet sərbəst güləşçilərə keçəcək. Əliabbas Rzazadə (57 kiloqram), Hacı Əliyev (65 kiloqram), Turan Bayramov (74 kiloqram), Osman Nurmaqomedov (86 kiloqram) və Georgi Meşvildişvili (125 kiloqram) “doğma divarlar” arasında mübarizə aparacaqlar.
Xatırladaq ki, Avropa Olimpiya Təsnifat turnirində hər çəkidə finala çıxan güləşçilər “Paris-2024”ə vəsiqə qazanacaqlar.
Yarış aprelin 5-dən 7-dək Milli Gimnastika Arenasında baş tutacaq.