Yeni tədris ili ərəfəsində vətəndaşların əlavə bilik və bacarıqlara yiyələnməyə nə dərəcədə maraq göstərdiklərini müəyyənləşdirmək üçün MTM (Media Təhlil Mərkəzi) tərəfindən təkmilləşdirmə və xarici dil kursları ilə bağlı 31 avqust – 5 sentyabr tarixlərində sorğu keçirilib.
Sorğuda iştirak edən 500 respondentin 49%-ni qadınlar, 51%-ni kişilər təşkil edib.
İşdən və dərslərdən kənar hər hansı təkmilləşdirmə və ya dil kurslarına getməklə bağlı sualın nəticələri göstərir ki, respondentlərin 16%-i bacarıqlarını təkmilləşdirmək üçün əlavə kurslara, 13%-i xarici dil, 8%-i qeyd olunan hər iki kursa gedirlər. Sualı cavablandıranların 33%-i kursa getməsələr də, müstəqil şəkildə öyrəndiklərini, 30%-i isə ümumiyyətlə, heç bir kursa getmədiklərini bildiriblər.
Respondentlərin 12%-i onlayn formada qrup şəklində, 7%-i onlayn şəkildə fərdi qaydada, 19%-i ofis şəraitində qrup halında, 7%-i ofis şəraitinidə fərdi şəkildə təhsil alır. Ümumiyyətlə kursa getməyənlər isə iştirakçıların 55%-ni təşkil edib.
“Pandemiya şəraitində hansı tədris formasını dəstəkləyirsiniz” sualını cavablandıranların 45%-i tədrisin ənənəvi, 20%-i distant formada keçirilməli olduğunu bildiriblər. İştirakçıların 15%-i isə indiki şəraitdə əyani təhsillə bağlı qərarı dəstəkləmədiklərini qeyd ediblər. Respondentlərin digər 20%-i tədis zamanı növbəlilik prinsipi və və sosial məsafənin qorunması vacibliyini vurğulayıblar.
“Hansı xarici dil kursuna gedirsiniz?” sualının cavabları isə aşağıdakı kimi olub:
İngilis 52%;
Rus 24%;
Alman 8%;
Fransız 4%;
İspan 3%;
İtalyan 2%;
Digər 9%;
Xarici dil öyrənmirəm 31%.