RESPONDENTLƏR DAHA ÇOX HANSI BANKLARA MÜRACİƏT EDİR?

Mərkəzi Bankın 2022-ci ilin fevral ayına dair statistik bülletenində qeyd olunur ki, hesabat ayında bankların əmanət portfeli 4.4% (412.9 mln. manat) artaraq 9,869.7 mln. manat təşkil edib. Əmanət portfelinin 55%-i (5,426.5 mln. manat) fiziki şəxslərin müddətli əmanətlərindən ibarətdir.

Bunu nəzərə alaraq, MTM (Media Təhlil Mərkəzi) vətəndaşlar arasında bank xidmətləri ilə bağlı sorğu keçirib. Sorğuda iştirak edən 1500 respondentin 64%-ni qadınlar, 36%-ni kişilər təşkil edib.

İlk sualda respondentlərdən hazırda hansı bankların xidmətlərindən istifadə etdikləri soruşulub. Bir neçə variant seçmək imkanına malik olan sorğu iştirakçılarının cavabı aşağıdakı kimi olub:

Kapital Bank – 53%;

Xalq Bank – 50%;

Azərbaycan Beynəlxalq Bankı – 49%;

Unibank – 24%;

Rabitəbank – 9%;

Azər Türk Bank – 9%;

PAŞA Bank – 8%;

Bank of Baku – 7%;

Bank Respublika – 6%;

ExpressBank – 5%;

Yelo Bank – 5%;

AccesBank – 5%;

Yapı Kredi Bank Azərbaycan – 1,3%;

Bank VTB – 1%;

Premium Bank – 0,7%;

Ziraat Bank – 0,7%;

Günay Bank – 0,5%;

Muğanbank – 0,5%;

AFB Bank – 0,5%;

ASB Bank – 0,3%.

Sorğuda iştirak edənlər banklara müraciət etmə səbəblərini də açıqlayıblar. Bir neçə cavab seçmək imkanına malik olan respondentlərin 65%-i “Əmək haqqımı həmin bankdan alıram” variantını seçib. Cavab verənlərin 45%-i səbəb kimi bankın etibarlı olmasını, 40%-i bank tərəfindən sərfəli şərtlərin təklif edildiyini, 34%-i onlayn ödəniş imkanlarının genişliyini qeyd edib.

Nəticələrə əsasən məlum olub ki, respondentlərin 32%-i üçün bankın tanınmış olması, 32%-i üçün ATM sayının çox olması daha vacibdir. Sorğu iştirakçılarının 30%-i hazırda istifadə etdiyi bankın uzunmüddətli müştərisi olduğu üçün həmin bankın xidmətlərindən yararlanmağa davam edir.

Cavab verənlərin 27%-i üçün bankın filial sayının çox olması, 17%-i üçün bank tərəfindən maraqlı kampaniyaların keçirilməsi çox önəmlidir. İştirakçıların 10%-i isə müştərisi olduğu bankı seçərkən dost və ya tanış məsləhətindən yararlanır.

Respondentlərin 49%-i banklara müraciət etmək üçün daha çox mobil tətbiqlərdən istifadə edir. Filiala yaxınlaşmağı məqsədəuyğun hesab edənlər iştirakçıların 32%-ni, çağrı mərkəzlərinə zəng etməyi məqbul sayanlar 11%-ni təşkil edib. İştirakçıların 5%-i banka müraciət vasitəsi kimi sosial şəbəkələrdən, 3%-i isə veb-saytdan daha çox istifadə etdiyini bildirib.

Sorğu iştirakçılarının 54%-i bankların xidmətlərindən razıdır. Göstərilən xidmətləri qənaətbəxş hesab edənlər cavab verənlərin 37%-ni təşkil edib. Respondentlərin 9%-i isə xidmətlərdən razı olmadığını vurğulayıb.

“Bank seçimi edərkən daha çox hansı amillərə üstünlük verirsiniz?” sualına ən çox 3 variant seçmək imkanına malik olan respondentlərin cavab nəticələri aşağıdakı kimi olub:

Etibarlılığına – 68%;

Sərfəli şərtlər təklif etməsinə – 66%;

Onlayn ödəniş imkanlarının genişliyinə – 41%;

ATM sayının çox olmasına – 33%;

Maraqlı kampaniyalar keçirməsinə – 26%;

Filial sayının çox olmasına – 21%;

Tanınmış olmasına – 19%;

Əvvəlki uğurlu təcrübəmə – 16%;

Dost/tanış məsləhətinə – 6%.