Kitab oxumaq mütaliə ilə məşğul olmaq dünyagörüşümüzü artırmaqla yanaşı, yüksək intellektə malik olmağımız bədii-estetik zövqümüzün formalaşmasında müstəsna əhəmiyyətə malikdir. İnsanların kitablara mütaliəyə olan marağını müəyyənləşdirmək məqsədilə MTM (Media Təhlil Mərkəzi) tərəfindən 03-08 avqust tarixlərində sorğu keçirilib.
Sorğuda iştirak edən 840 respondentin 55%-ni qadınlar, 45%-ni kişilər təşkil edib.
“Kitab oxumağa vaxt ayırırsınız?” sualını cavablandıran respondentlərin 40%-i mütaliəyə kifayət qədər, 38%-i az vaxt ayırdığını bildirsə də, 10%-i kitab oxumağı sevmədiyini qeyd edib. Cavab verənlərin 11%-i vaxt çatışmazlığına görə mütaliə etmədiyini vurğulayıb.
Bir neçə variant seçmək imkanına malik olan respondentlər “Ən çox hansı kitabları oxuyursunuz?” sualına aşağıdakı kimi cavab verib:
Şeir – 17%;
Sevgi hekayələri – 25%;
Tarixi romanlar – 30%;
Peşəkar ədəbiyyat – 23%;
Elmi ədəbiyyat – 31%;
Detektiv romanlar – 43%;
Fantastik əsərlər – 24%;
Digər – 31%;
Kitab oxumuram – 10%
“Son 10 ay ərzində neçə kitab oxumusunuz?” sualını cavablandıranların 53%-i “1-3”, 19%-i “4-6”, 5%-i “7-9”, 8%-i “9-dan çox” variantını seçib. Sorğu iştirakçılarının 16%-i ümumiyyətlə kitab oxumadığını bildirib.
Sorğuda iştirak edənlərin 51%-i kitab oxumaq üçün mobil tətbiqdən istifadə etsə də, 49%-i istifadə etmir.
Respondentlərin 14%-i səsli kitab dinləməyə üstünlük verdiyini, 75%-i dinləmədiyini, 10%-i isə kitabı ənənəvi üsulla oxumağın tərəfdarı olduğunu qeyd edib.