
Ölkəmiz 60 illik gecikmədən sonra da olsa, dünyanın nüvə gücü ölkələri liqasına yüksəldi.
Bunu Akkuyu Atom Elektrik Stansiyasına ilk nüvə yanacağının gətirilməsinə dair rəsmi mərasimə canlı bağlantı ilə qatılan Türkiyə Prezidenti Rəcəb Tayyib Ərdoğan deyib.
“Hava və dəniz yolu ilə gələn nüvə yanacağının elektrik stansiyamıza çatdırılması ilə Akkuyu artıq nüvə obyekti kimliyini qazandı”, – R.T. Ərdoğan qeyd edib.
R.T. Ərdoğan Avropa Komissiyasının nüvə enerjisini “yaşıl enerji” olaraq qəbul edərək tərəddüdləri aradan qaldırdığını xatırladıb.
“Akkuyu ilə ölkəmizi bu inkişafın bir parçası etdik. Bir çox mühüm layihələr kimi, Akkuyu da milli büdcəmizi yükləməyən bir maliyyələşdirmə modeli ilə həyata keçirilib. Akkuyu Rusiya ilə ən böyük ortaq sərmayəmizdir”, – R.T. Ərdoğan əlavə edib.
Ölkə başçısı Akkuyu AES-in bütün bloklarının 2028-ci ilə qədər mərhələli şəkildə istifadəyə veriləcəyini və Türkiyənin elektrik istehlakının 10 faizinin bu stansiyadan təmin ediləcəyini diqqətə çatdırıb.
Onun sözlərinə görə, Akkuyu tam gücü ilə işə düşəndə təxminən 35 mlrd. kilovat-saat elektrik enerjisi istehsal olunacaq: “Təbii qaz idxalımızın azalmasına hər il 1,5 milyard dollar töhfə verəcək bu layihə milli gəlirimizin artmasına da müsbət təsir göstərəcək”.
R.T. Ərdoğan Akkuyu AES-in 6 fevral zəlzələsindən təsirlənmədiyini, bunun mühəndis və fəhlələrin işlərini nə qədər vasvasılıqla yerinə yetirdiyini göstərdiyini söyləyib.
“Layihədəki təcrübəmiz işığında, müxtəlif bölgələrdə tikməyi planlaşdırdığımız ikinci və üçüncü atom elektrik stansiyalarımız üçün ən qısa zamanda hərəkətə keçəcəyik”, – o əlavə edib.