Martın 3-dən 6-dək paytaxtımız Akrobatika Gimnastikası üzrə 12-ci Dünya Yaş Qrupları Yarışlarına ev sahibliyi edəcək.
Azərbaycan Gimnastika Federasiyasından verilən məlumata görə, federasiyanın ilk dəfə olaraq təşkil edəcəyi yarışda ilkin qeydiyyat siyahısına əsasən 21 ölkədən 466 gimnastın iştirakı gözlənilir.
Yarışda idmançılar 12-18 və 13-19 yaş qrupları üzrə kişi cütlükləri, qadın cütlükləri, qarışıq cütlüklər, kişi qrupları, qadın qrupları balans, temp və qarışıq hərəkətlər proqramında qüvvələrini sınayacaqlar.
Yarışda Azərbaycanı 12-18 yaş kateqoriyasında Rəsul Seyidli, Rəvan Zeynallıdan ibarət kişi cütlüyü, Nəzrin Qasımova, Xanım Məmmədzadədən ibarət qadın cütlüyü, Milana Əliyeva, Nizam Xamidulindən ibarət qarışıq cütlük, Anahita Bashiri, Zəhra Rəşidova, Nəzrin Zeyniyevadan ibarət qadın qrupu və 13-19 yaş kateqoriyasında Leyla Bəşirova, Nəzrin Fərmanova, Mənsumə Məmmədzadədən ibarət qadın qrupu təmsil edəcək.
Xatırladaq ki, 2018-ci ildə ölkəmiz ilk dəfə akrobatika gimnastikası üzrə Dünya kuboku yarışlarına ev sahibliyi edib.
Ötən il İsveçrənin Cenevrə şəhərində keçirilən akrobatika gimnastikası üzrə 11-ci dünya yaş qrupları yarışları təmsilçilərimizin bürünc medal qazanması ilə yadda qalmışdı. Belə ki, Mənsumə Məmmədzadə, Leyla Bəşirova və Nəzrin Fərmanovadan (12-19 yaş qrupu) ibarət qadın qrupumuz qarışıq hərəkətlər proqramı üzrə final çıxışlarına görə fəxri kürsünün üçüncü pilləsində yer almışdılar.
Bu medal Azərbaycan gimnastika tarixində məhz dünya yaş qrupları yarışlarında qadın qrupu proqramında əldə olunan ilk nəticə olub. Həmin yarışda finala yüksələn Milana Əliyeva və Nizam Xamidulindən (12-19 yaş qrupu) ibarət qarışıq cütlüyümüz 5-ci olmuşdu.
Qeyd edək ki, paytaxtımızda keçiriləcək yarışların Azərbaycan Respublikası Nazirlər Kabinetinin xüsusi icazəsi ilə ölkəmizdə tətbiq edilən mövcud karantin qaydalarına və sanitar-epidemioloji tələblərə uyğun olaraq və tamaşaçı iştirakı olmadan keçirilməsi planlaşdırılır.
Yarışlar haqqında mütəmadi olaraq yenilənən məlumatlar saytımızda (https://agf.az/az/competitions/) əks olunacaq.