Qırğızıstanın “Piramida” dövlət televiziya kanalının “Dostluq körpüsü” proqramının növbəti sayı Türkdilli Dövlətlərin Əməkdaşlıq Şurasının İstanbulda keçirilən VIII Zirvə Görüşünə və Azərbaycan Prezidenti İlham Əliyevin tədbirdə iştirakına həsr olunub.
Verilişdə dövlət başçılarının keçirdiyi ikitərəfli görüşlər və Zirvə toplantısında qəbul olunan qərarlara geniş yer verilib.
Zirvə Görüşündə Azərbaycan Prezidenti İlham Əliyevə Türkiyə Prezidenti Rəcəb Tayyib Ərdoğan tərəfindən verilən “Türk Dünyasının Ali Ordeni” ilə bağlı verilişdə geniş videomaterial təqdim edilib.
Həmçinin Azərbaycan Prezidenti İlham Əliyevin digər türkdilli ölkələrin rəhbərləri ilə keçirdiyi ikitərəfli görüşlər də işıqlandırılıb.
Bildirilib ki, Azərbaycan Prezidenti İlham Əliyevin qırğızıstanlı həmkarı Sadır Japarovla görüşündə ölkələr arasında siyasi, iqtisadi, humanitar sahələrdə əməkdaşlığın dərinləşdirilməsi məsələləri müzakirə edilib.
Xatırladaq ki, proqramın aparıcıları Bişkekdəki “Türkel” Media Qrupunun rəhbərləri Hökümə Xəlilova və Ramiz Məşədihəsənlidir.
