Media Təhlil Mərkəzinin (MTM) Analitik qrupunun fikrincə, günün TOP-5 mövzusu aşağıdakılar ola bilər:
Top of Form
1. Azərbaycanda hərb sənayesinin inkişafı
Prezident İlham Əliyev AMEA-nın 80 illik yubileyində çıxışı zamanı ölkənin müdafiə qabiliyyətinin gücləndirilməsi və hərbi sənayenin modernləşdirilməsinin prioritet istiqamətlərdən biri olduğunu vurğulayıb. Dövlət başçısı qeyd edib ki, milli hərb sənayesinin inkişafı Azərbaycanın təhlükəsizliyinin təminatında mühüm rol oynayır.
2. Dünyada beynəlxalq təşkilatların rolu zəifləyir
Prezident İlham Əliyev bildirib ki, qlobal miqyasda beynəlxalq təşkilatların təsir gücü zəifləyib, bu da beynəlxalq münasibətlərdə hərbi və siyasi güc amilini ön plana çıxarır. Onun sözlərinə görə, yeni dünya düzənində dövlətlərin öz maraqlarını qorumaq üçün daha çox öz gücünə arxalanması zəruridir.
3. Azərbaycan elminin əsas vəzifələri
Prezident İlham Əliyev Azərbaycan elminin qarşısında dayanan strateji məqsədləri açıqlayaraq, elmi yeniliklərin iqtisadiyyatın real sektoruna inteqrasiyasını, gənc alimlərin dəstəyini və elmi nəticələrin praktik tətbiqini vacib hesab edib. O, elmin milli inkişaf modelində əsas hərəkətverici qüvvələrdən biri olduğunu qeyd edib.
4. Nikol Paşinyanın seçki platforması
Ermənistanın Baş naziri Nikol Paşinyan növbəti parlament seçkilərinə “Qarabağsız Ermənistan” platforması ilə qatılacağını bəyan edib. Bu, onun siyasi kursunun Qarabağ məsələsində yeni reallıqları qəbul etdiyini göstərir. Paşinyan bu yanaşma ilə regionda sülh və sabitlik quruculuğuna yönəldiyini iddia edir.
5. Avropa-Azərbaycan mediası arasında körpü
Azərbaycan nümayəndə heyətinin Rumıniyaya səfəri zamanı informasiya-kommunikasiya sahəsində əməkdaşlıq imkanları müzakirə olunub. Görüşdə Avropa və Azərbaycan mediası arasında qarşılıqlı məlumat mübadiləsi, birgə layihələrin həyata keçirilməsi və media sahəsində təcrübə paylaşımı məsələləri önə çəkilib.