Myanmada martın 28-də baş verən 7,7 bal gücündə zəlzələnin fəsadları nəticəsində həlak olanların sayı 1002-yə çatıb.
Myanmanın Dövlət İdarə Şurası bu barədə açıqlama yayıb. Son məlumata görə 2376 nəfər xəsarət alıb, 30 nəfər isə itkindir. Axtarış-xilasetmə işləri davam edir.
Yeraltı təkan paytaxt Naypyida şəhəri və Mandalay regionunda xeyli dağıntıya səbəb olub. Bəzi yaşayış məntəqələrində elektrik təchizatı və mobil rabitə sistemi pozulub. Paytaxt ilə ölkənin ən böyük şəhərini birləşdirən magistral yola, xüsusən də körpülərə və yol ötürücülərinə ziyan dəyib. Nəticədə yolun müəyyən hissəsindən istifadə etmək mümkün deyil.
Myanma İttifaqı Respublikasının Dövlət İdarə Şurasının Sədri Min Aunq Hlainq yardım üçün beynəlxalq ictimaiyyətə müraciət edib.
Qeyd edək ki, martın 28-də yerli vaxtla saat 12:10-da Myanmada 7,7 bal gücündə zəlzələ olub. Zəlzələdən sonra 2,8-7,5 aralığında 12 afterşok qeydə alınıb.