Ermənistanın baş naziri Nikol Paşinyanın son bəyanatlarında Bakıda mühakimə edilən erməni cinayətkarlara qarşı qəddar rəftar edildiyinə dair kəşfiyyat məlumatlarına malik olduqlarını bildirməsi onun Azərbaycana münasibətdə həyata keçirmək istədiyi qara piyar siyasətinin tərkib hissəsidir. Nikol Paşinyan da, onun havadarları da əslində bu cür halların baş vermədiyini yaxşı bilir, hətta onlarda buna dair hər hansı kəşfiyyat məlumatlarının olmadığı da bəllidir. Lakin görünür, daxili siyasi arenada öz mövqeyini qorumaq və əhalinin diqqətini ölkədaxili problemlərdən yayındırmaq üçün Nikol Paşinyana bu cür məsuliyyətsiz bəyanatlar vermək sərf edir. Halbuki, həmin cinayətkarlar vaxtilə məhz Nikol Paşinyanın iqtidarı üçün ciddi təhlükə mənbəyi idi və onlar dayanmadan Ermənistan cəmiyyətində narahatlıq yaradır, xaricdən aldıqları dəstəklə ölkədəki ictimai-siyasi vəziyyəti pozurdular.
Onillər boyu Ermənistanın bir çox analitikləri də etiraf edirlər ki, hazırda Bakıda mühakimə edilən həmin şəxslər ölkə daxilində radikal separatçı və terrorçu fəaliyyətləri ilə tanınırdılar. Xüsusilə, Nikol Paşinyan iqtidarının ilk illərində bu qruplar onun hökumətinə qarşı müxtəlif təxribatlar həyata keçirməklə ad çıxarmışdılar. Hətta Ermənistan mətbuatı bir vaxtlar həmin şəxslərin Paşinyanın idarəçiliyinə təhdid yaratdığını yazırdı. Bu şəxslərin bir çoxunun silahlı hücumlar, terror aktları və digər cinayət əməllərində iştirak etdiklərini nəzərə alsaq təhlilçilər də, mətbuat da haqlı idi. Çünki onların fəaliyyətləri təkcə Ermənistan daxilində siyasi sabitliyi pozmaqla məhdudlaşmırdı, onlar həm də Azərbaycanla müharibədə insanlıq əleyhinə bir sıra qanlı cinayətlər törətmiş, Azərbaycan torpaqlarının işğalında birbaşa rol oynamışdılar. Uzun illər hakimiyyətdə olmuş Qarabağ klanının hakimiyyəti gedəndən sonra yeni baş nazir üçün əsl problemə çevrilən və dayanmadan onun iqtidarını təhdid edən bu şəxslərin indi Paşinyan tərəfindən himayə edilirmiş kimi təqdim edilməsi həm təəccüb, həm də ikrah doğurur. Birincisi, bu, onu göstərir ki, Ermənistanda kimin hakimiyyətdə olmasından asılı olmayaraq, erməni hakimiyyətlərinin cinayətkar xisləti dəyişmir. İkincisi, bu, ondan xəbər verir ki, Ermənistan Azərbaycanla münasibətlərin normallaşmasında maraqlı deyil və hələ də vaxt qazanıb müəyyən manevlər etməyə çalışır. Yoxsa əvvəllər öz iqtidarını qorumaq üçün onları cinayətkar adlandıran baş nazir indi niyə bu şəxsləri Azərbaycanın mühakimə etməsi fonunda beynəlxalq ictimaiyyəti yanlış məlumatlandırsın?
Nikol Paşinyanın hansı bəyanatı verməyindən asılı olmayaraq, Azərbaycan həmin cinayətkarları beynəlxalq hüquq normalarına uyğun şəkildə mühakimə edir. Məhkəmə prosesləri şəffaf şəkildə aparılır və beynəlxalq müşahidəçilərin iştirakına da şərait yaradılır. Bakı həmin şəxsləri həm Ermənistanın daxili siyasətinə, həm də regionun təhlükəsizliyinə təhdid yaradan terror aktlarına görə məsuliyyətə cəlb edib.
Azərbaycanın mövqeyi aydındır: bu cinayətkarlar həm beynəlxalq hüququ, həm də humanitar prinsipləri pozaraq, mülki şəxslərin həyatına təhlükə yaradan əməllər törədiblər. Onların məsuliyyətə cəlb olunması regionda davamlı sülhün və təhlükəsizliyin təmin olunması üçün mühüm addımdır. Bu kontekstdə Nikol Paşinyanın iddiaları yalnız ictimai rəyi manipulyasiya etmək cəhdi kimi qiymətləndirilə bilər.
Nikol Paşinyanın iddiaları, eyni zamanda, onun daxili siyasi vəziyyətini anlamaq üçün də əhəmiyyətlidir. Ermənistan hazırda ciddi sosial, iqtisadi və siyasi problemlərlə üz-üzədir. Qarabağ müharibəsindəki məğlubiyyətin ağır nəticələri, əhalinin etimadsızlığı və müxalifətin güclü təzyiqləri Paşinyanı daha da zəif mövqeyə salır. Belə bir vəziyyətdə Paşinyanın Azərbaycanı ittiham etməsi, daxili auditoriyaya ünvanlanmış populist mesajdan başqa bir şey deyil. Ona görə də Paşinyanın bu addımı bir tərəfdən Azərbaycanla münasibətlərin daha da gərginləşməsinə, digər tərəfdən isə Ermənistanın beynəlxalq imicinin zədələnməsinə səbəb olur. Bu cür bəyanatlar, həm Ermənistan cəmiyyətində, həm də xarici ölkələrdə onun səmimiyyətinə və siyasi bacarığına dair suallar yaradır. Bu vəziyyətdən istifadə edərək siyasi xal qazanmaq cəhdləri onun siyasi karyerasındakı ziddiyyətləri daha da qabardır.
MTM Analitik Qrup